| 1 | Januar:
Jatz wend d'Täg schao' wider länger,
iatz hot d'Sonn schao' wieder Kraft,
kriagt ma'-n-ao noh klamme Fenger,
wemma' schäfflet oder schafft. |
| 2 | Muaß ma'-n-ao noh's Liacht verbrenne',
iatzet gohts mit jedem Tag,
fürsche, iatz hoaßts waate' könne',
s'Leaba kriagt en nuie' Schlag. |
| 3 | Send ao d'Äcker, send ao d'Felder,
tiaf vergrabe noh em Schnai,
en zwua Monet oder bälder,
wuuds gaoh wieder anderst sei'. |
| 4 | Februar:
Dusse hots noh Schnai ond Eis,
schleifetse ond Schlittebahne',
aber hentrem Ofe d'Ahne',
klagnet über Reißmattheis. |
| 5 | s'Behnelädle sait se, häb,
heut de ganz Naacht wieder gschlage',
o sie kö'ts bigott vertrage',
wenns bald ander Wetter gäb. |
| 6 | D'Ahne' speirts, drom naus vors Haus,
heut noh Schlitte' gfahre', Kender,
moane' morge' lauft der Wenter
schao' vielleicht zom Kehner naus. |
| 7 | März:
Meezschnai, Meezschnai,
tuat oam en de Auge' waih,
a de Roa' ond en de Gräbe,
wehrt'r se ond will noh lebe. |
| 8 | 's hilft em nonz, s'ist a dr Zeit,
mo doch bald dr Guggugg schreit,
mo-s doch schao' a' warme Plätzlen,
Veiglein geit ond Palmekätzlen. |
| 9 | Dorom hao-n-e heut de letzt
Schnaibal an en Boom na'bätscht,
jatz ka' d'Sonn dean wüaste' nasse
Schnai vo' mir aus vollzger schasse. |
| 10 | April:
Dear hot älls em gleiche Säckle,
lache, heule, warm ond kalt,
wemma moa't iatz müaß noh bald,
s'Frühjohr komme, sait'r, Dreckle,
i halt mi a' koan Kalender,
iatz mach i zum Posse Wenter. |
| 11 | Ond dr Petrus, dear ka lache,
dear hot d'Luse em April,
weil'r do beim Wettermache,
toa' ond lao' ka, wa-n-r- will. |
| 12 | Mai:
's ganz Oat em Bluast vergrabe,
dr Hemmel durna blo,
ond d'Wiese' vol Bagenge,
ond 's Lüftle lend ond lo. |
| 13 | Uf jedem Boom e Hachzich,
e Fest uf jedem Zweig,
dr Emeritz bloset s'Flötle,
ond d'Grille spielet Geig. |
| 14 | Ond Ziache, Schüüz ond Hemmeder,
dia pfluderet frisch gwäscht,
vo' älle Zäu' ond Stotze
wia Fahne bei me Fest. |
| 15 | Juni:
Laufet Kender, hollet Sträuß,
uf dr Wies blüaht älles zemme',
geal ond raot ond blo ond weiß. |
| 16 | Aber tapfer, sust geits Heu,
ond dean Salbei ond dean Esper,
ond dia Wicke' ond dean Klai,
frißt en Ochs zom Vesper. |
| 17 | Juli:
's ist et ganz sauber, 's sticht so d'Sonn,
ond 's zitteret so d'Blätter,
ond d'Schwalbe fliaget so weit honn,
i glaub, es konnt e Wetter. |
| 18 | Koa Wonder, so e Beckehitz,
hot müasse'n ebbes brenge,
do, hend-rs gseah, ganz blo, e Blitz,
ond do, schao fangts a' renge. |
| 19 | Ond noh brichts laos, 's tuat Schlag uf Schlag,
's verreißt oam schiergär d'Achre,
ma moat, iatz komm dr jöngste Tag,
mit blitz-n-ond mit daore. |
| | 20 | des kracht, zuckt ond schleecht gaoh ei,
ond 's schüttet wia mit Kübel,
's hot könne' et viel ärger sei,
ber Sentflut en dr Bibel. |
| 21 | Ond grad so schnell, wias komme'-n-ist,
so hot ses wied verzoge,
ond d'Welt leit wieder sauber gwischt,
em schö'gste Reageboge. |
| 22 | August:
's Baremeter stoht uf "bständig",
d'Sonn brennt donderschlächtig hoaß,
d'Auge tend oam waih vor Helle,
ond ma trialat ganz vor Schwoaß. |
| 23 | 'Städtle doßlet ganz verschlofe',
weit ond broat koa Menscheseel,
ond en älle Gasse stenkts noch
Karresalb ond Bremse-n-öl. |
| 24 | Nonz verregt se uf em Märktplatz,
überal send d'Läde zua,
s'Wasser pflätschret aus em Bronne',
descht e Stille, descht e Ruah. |
| 25 | D'Mucke somset, faul ond meahlig,
gähnet en dr Tür dr Beck,
zmol mit Garre', hüh ond Knelle,
konnt e Garbewag oms Eck. |
| 26 | September:
Dr Mo' konnt ruf, ganz furig raot,
ond Neabel hanget en de Büsch,
wias herbstelet, s'tät beinoh naot,
ma brenn schao wieder ei, so frisch
isch obneds em September. |
| 27 | Ond zwische Tag ond Siehst-nix-maih
gehnd d'Kender mit de La'pio',
ond lang, lang garret d'Fuhrwerk noh,
wenns donkel ist, vom Acker rei
mit Rüabe'-n-ond Burgonder. |
| 28 | Ond noh wuuds mäuslestill, dr Mo'
schlupft henter d'Bööm ond s'Schuredach,
ond neaneds ist maih ebber wach,
nao en dr Kelter romplets noh,
vo'Kübel ond vo' Gelte. |
| 29 | Oktober:
Dr Neabel fällt ond d'Sonn schlupft raus,
beim Schnaufe' geits en Hauch,
ond s'Gwülk am Hemmel dob sieht aus,
wia Dubakspfeiferauch. |
| 30 | Ond d'Schlaihe a' dr Büsch send blo,
ond d'Hägebutze raot,
ond uf em Feld stoht hia ond do,
noh ebbes Köhl ond Kraut. |
| 31 | Ond uf de Obstbööm gilbet's Laub,
ond mo frisch gackret ist,
do schmeckt dr Bode' - mit Verlaub,
noch Gülle'-n-ond noch Mist. |
| 32 | November:
Descht e naßkalts Sudelwetter,
vo de Bööm wehts dürre Blätter,
ond dr Hemmel, katzegro,
hanget wia naß Lei'tuach do. |
| 33 | Haörsch de' Luft oms Hauseck feage',
siehst dean feine Schnürlesreage',
d'Wetterfah' grillt uf em Dach,
ond dr Kehner lauft wia Bach. |
| 34 | Descht e Musek zom senniere',
schao November, s'wuud bald gfriere',
noh konnt Weihnächt, noh hots bald,
d'Zeit vergoht, so wuud ma'-n-alt. |
| 35 | Ond ma' doßet neabem Ofe',
ond ma' gucket ganz verschlofe,
wia dr Rauch zur Pfeif raus zuht,
ond wias dusse' Obed wuud. |
| 36 | Dezember:
Gucket ao, wias dusse' schneit,
iatz ist's Christkend nemme weit,
überal wuud grührt ond gwoge',
nei 'glangt bis zom Eleboge'. |
| 37 | Überal wuud knaatscht ond bache',
schmeckts noch taused guate Sache,
Schnitzbrot, Zemtstean, Bäretätzlen,
Sprengerlen ond Anisplätzlen. |
| 38 | Ond des Gschmäckle ond des Düftle,
ond des kalt Dezemberlüftle,
brent e jedem wied e Stuck,
vo' de Kenderzeite' zruck. |
|