| 1 | O Hoamet a'dr Eye,
moascht, di kennt i verlao'?
Du lieber Gott, i müaßt jo
voar Jomer schier vergaoh'! |
| 2 | Guck d'Schalksburg a', de' Zoller,
de' Hiirschberg ond de Roa,
de' Hondsruck ond de' Böllat,
Schofberg ond Lochestoa! |
| 3 | Am Heuberg ond uff Hange'
am Huurn, em Bei'zebohl,
am Geigelberg, am Lendle,
dot wurd's oam leicht ond wohl! |
| 4 | Dr Wasserturm stoht vürneahm
bhäb neabem alte Schloss -
ond deert am Schweafelbronne'
trä'kt ma' no' Küeh ond Ross. |
| 5 | Dia saufet fescht ond jucket
ond sprenget durenand,
bis d'Kneacht en Stall zruck jaichet,
a jedes en sein Stand. |
| | 6 | Dia Manna gohnt zom Veschper,
d'Burscht badet no am Rä'kle,
ond d' Weiber neahmet d'Arbet
em Schuuz voars Haus uffs Bä'kle. |
| 7 | Vom Turn ra höart ma blosa,-
älls hebt da Odem a;
so isch es, wenn oas g'storba,
so lang ma de'ka ma'! |
| 8 | Jo, ei' se Turn der langet
schier gar en Hemmel nei';
wia veil send au zum Kirchtoar
schao' gange' aus ond ei'! |
| 9 | En Kirchhof traitt ma zleschta
oan om da andra naus;
S'wurd wäger it z'lang daura',
no gruebet miar deert aus. |
|